Ontario səhiyyə sistemi hələ də ciddi problemlərlə üzləşir. Toronto və ətraf bölgələrdə minlərlə insanın hələ də ailə həkimi yoxdur və onlar əsas tibbi xidmətlərə çatmaqda çətinlik çəkirlər.
«Azerbaijan Post» bildirir ki, ailə həkimlərinin çatışmazlığı Ontario səhiyyəsində əsas problemlərdən biri hesab olunur. Bir çox insan sağlamlıq problemləri zamanı öz həkiminə müraciət edə bilmədiyi üçün növbəsiz klinikalara və ya xəstəxanaların təcili yardım şöbələrinə getməyə məcbur olur. Bu vəziyyət isə xəstəxanalara əlavə yük yaradır.
Son illərdə Toronto xəstəxanalarında gözləmə vaxtı artıb və təcili yardım şöbələrində sıxlıq əsas narahatlıqlardan birinə çevrilib. Əhalinin artması, tibbi xidmətlərə ehtiyacın çoxalması, həkim və tibb işçilərinin çatışmazlığı bu vəziyyətin əsas səbəbləri arasında göstərilir.
Ontario hökuməti bu problemləri azaltmaq üçün yeni həkimlərin cəlb edilməsi, tibbi təhsil imkanlarının artırılması və səhiyyə xidmətlərinin genişləndirilməsi istiqamətində proqramların həyata keçirildiyini bildirib. Lakin bir çox mütəxəssis hesab edir ki, problemi tam həll etmək üçün daha çox maliyyə yatırımı və uzunmüddətli plan lazımdır.
Fakhriddin Khudaykulov
( LJI Reporter)
