11 Bəhmən 1403-cü il tarixində Təbriz şəhərinin petroşimi salonunda Dr. Davudinin rəhbərlik etdiyi “Təbrizin səsi” ansamblı və xor qrupunun möhtəşəm konserti baş tutub. Azərbaycan musiqi mədəniyyətinin zənginliyini nümayiş etdirən bu gecədə xalq mahnıları, bəstəkar mahnıları və Üzeyir Hacıbəylinin məşhur “Arşın mal alan” operettasından əsərlər tamaşaçılar üçün təqdim olunub. “Azerbaijan Post” bildirir ki, konsertin ən diqqətçəkən məqamlarından biri Dr. Davudinin rəhbərliyi altında hazırlanan kor qrupunun çoxsəsli (polifonik) ifaları oldu. Onun geniş repertuarı və musiqiyə olan dərin sevgisi konsert iştirakçılarını valeh edib.
Onu da qeyd edək ki, konsertin bütün biletlər qısa müddətdə satılıb. Sevindirici haldır ki, Təbrizdə və digər Azərbaycan şəhərlərində klassik və akademik musiqiyə olan maraq getdikcə artır.Konsertdən sonra müxtəlif şəhərlərdən Dr. Davudinin ansamblı və xor qrupunu çıxış etməyə dəvət edən çoxsaylı təkliflər gəlib. Bu da onu göstərir ki, Azərbaycan musiqisi bölgənin müxtəlif yerlərində sevilir və yüksək dəyərləndirilir.Ansamblın və xor qrupunun konsertmeystri və pianisti
Gülnarə Əsədova idi. Bundan əlavə, Təbrizin tanınmış musiqiçiləri bu möhtəşəm gecəyə öz töhfələrini verdilər:Piano: Gülnarə Əsədova Qarmon: Məhəmməd SəbukdəstiTar: Behruz Müqəddəmnejad Nağara: Elvin Sadat
Kamança: Əfşin Ələvi Akkordeon: Hadi Seyrəfi Perküsiya: Məhəmməd Azəri Klarnet: Əli SərvəriKonsertin ən yaddaqalan məqamlarından biri 3 uşaq qrupunun – “Alma”, “İşıq” və “Batur” qruplarının – birgə ifası olub. Onlar “Sizə salam gətirmişəm” mahnısını səsləndirərək salonda xüsusi bir abu-hava yaradıblar.Bundan əlavə, Dr. Davudinin üç istedadlı tələbəsi – Puya Səttari, Firuz Vahidi və Mahmud Qurbani ilə birlikdə oxuduğu məşhur “Sənə də qalmaz” mahnısı tamaşaçılara duyğusal anlar yaşadıb və alqışlarla qarşılanıb.
Beləliklə, bu möhtəşəm gecə Azərbaycan musiqisinin gücünü və onun cəmiyyət tərəfindən necə sevildiyini bir daha nümayiş etdirdi. Təbrizdə baş tutan bu konsert təkcə bir musiqi tədbiri deyil, mədəniyyətimizi yaşadan və onu gələcək nəsillərə ötürən bir layihədir. Dr. Davudinin rəhbərliyi altında fəaliyyət göstərən “Təbrizin Səsi” ansamblı və xor qrupunun bundan sonra da müxtəlif şəhərlərdə çıxış edəcəyi gözlənilir.
“Azerbaijan Post”
