Türk Dünyası ilə bağlı 35 illik mühüm fəaliyyəti olan tədqiqatçı jurnalist və İpək Yolu İctimai Diplomatiya Təşkilatının sədri Dr. Seyfullah Türksoya “Azərbaycan Dövlət Xidmət Medalı” təqdim edilib.

Jurnalist-yazar Dr. Seyfullah Türksoyun medalla təltif edildiyi mərasimdə Azərbaycan Diasporla İş üzrə Dövlət Komitəsinin sədri Fuad Muradov, MHP başqan müavini Prof. Dr. İlyas Topsakal, Türkiyə–Azərbaycan Parlamentlərarası Dostluq Qrupunun sədri Şamil Ayrım, TADEF başqanı Adalət Turan, vətəndaş cəmiyyəti təşkilatlarının nümayəndələri, ictimai xadimlər və sənətçilər də iştirak ediblər.

TADEF-in Ümumi Yığıncağında keçirilən mükafatlandırma mərasimində çıxış edən Dr. Seyfullah Türksoy, “Məni Dövlət Xidmət Medalına layiq görüb şərəfləndirən Azərbaycan Prezidentinə və Diaspor Komitəsinin sədri hörmətli Fuad Muradova təşəkkür edirəm”, – deyə bildirib. Mərasimdə MHP başqan müavini Prof. Dr. İlyas Topsakal, TADEF başqanı Adalət Turan və bəzi vətəndaş cəmiyyəti təşkilatlarının nümayəndələrinə də medallar təqdim edilib.

35 İLLİK ZƏHMƏT

Xocalı soyqırımı və Qarabağın ermənilər tərəfindən işğalı başda olmaqla Azərbaycanın milli məsələlərini və ölkədəki hadisələri illər boyu televiziya ekranları vasitəsilə Türkiyəyə və dünyaya çatdıran Seyfullah Türksoy, ictimai fəaliyyətləri ilə bu mövzuları daim gündəmdə saxlamışdır. Bu müddət ərzində çoxsaylı konfranslar, simpoziumlar və qurultaylar təşkil etmişdir. Qarabağın işğaldan azad edilməsindən sonra Türkiyədə ilk dəfə Qarabağ Zəfər Bayramı qeyd etmə təşəbbüsünü Seyfullah Türksoy irəli sürmüş və hər il yüzlərlə seçkin şəxsin iştirakı ilə bu tədbirləri davam etdirir.

XATİRƏLƏR İŞIĞINDA HEYDƏR ƏLİYEV KİTABI VƏ SƏNƏDLİ FİLM

Jurnalist-yazar Seyfullah Türksoyun Azərbaycanın ümummilli lideri Heydər Əliyevin 100 illik yubileyi münasibətilə görkəmli jurnalist-yazar Etibar Babayevlə birgə qələmə aldığı “Xatirələr işığında Heydər Əliyev” adlı kitab intellektual dairələrdə böyük maraqla qarşılanıb. Kitab Türkiyə ilə yanaşı, Özbəkistan, Qazaxıstan, Qırğızıstan və Rumıniyada təqdim edilmiş və bir müddət əvvəl alban dilinə tərcümə edilərək Tirana şəhərində nəşr olunmuşdur. Kitabın başqa dillərə tərcümə edilərək digər ölkələrdə də nəşr olunması planlaşdırılır.

Kitabla yanaşı, 2023-cü ildə Prof. Dr. Etibar Babayev və Seyfullah Türksoy tərəfindən Azərbaycanın ATV kanalında dəfələrlə yayımlanan “Türk Dünyasının Qüruru: Heydər Əliyev” sənədli filmi hazırlanıb.

Kitab və sənədli filmdə, xüsusilə 9-cu Türkiyə Prezidenti Süleyman Dəmirəl, Prof. Dr. İhsan Doğramacı, Namik Kamal Zeybək, Hikmət Çətin, Cavit Çağlar, Barış Manço, Abdülbari Güzəl, Zülküf Ceylan, Cemal Yangın kimi şəxslərin, eləcə də Azərbaycanın milli lideri, böyük dövlət xadimi Heydər Əliyevlə yaxın dostluq münasibətində olmuş dövlət adamlarının, bürokratların, iş adamlarının, sənətçilərin və jurnalistlərin maraqlı xatirələri yer alır. Kitab və sənədli film Azərbaycanın son 40 ilinə işıq salır.

"Azerbaijan Post"